Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.189 | Dem. 18.192 (English) | >>Dem. 18.195 |
18.191τοῦτο τοίνυν ἐποίησα , τοῦ κήρυκος ἐρωτῶντος , Αἰσχίνη , “τίς ἀγορεύειν βούλεται ,” οὐ “τίς αἰτιᾶσθαι περὶ τῶν παρεληλυθότων ,” οὐδὲ “τίς ἐγγυᾶσθαι τὰ μέλλοντʼ ἔσεσθαι ;” σοῦ δʼ ἀφώνου κατʼ ἐκείνους τοὺς χρόνους ἐν ταῖς ἐκκλησίαις καθημένου , ἐγὼ παριὼν ἔλεγον . ἐπειδὴ δʼ οὐ τότε , ἀλλὰ νῦν δεῖξον . εἰπὲ τίς ἢ λόγος , ὅντινʼ ἐχρῆν εὐπορεῖν , ἢ καιρὸς συμφέρων ὑπʼ ἐμοῦ παρελείφθη τῇ πόλει ; τίς δὲ συμμαχία , τίς πρᾶξις , ἐφʼ ἣν μᾶλλον ἔδει μʼ ἀγαγεῖν τουτουσί ;
ἀλλὰ μὴν τὸ μὲν παρεληλυθὸς ἀεὶ παρὰ πᾶσιν ἀφεῖται , καὶ οὐδεὶς περὶ τούτου προτίθησιν οὐδαμοῦ βουλήν · τὸ δὲ μέλλον ἢ τὸ παρὸν τὴν τοῦ συμβούλου τάξιν ἀπαιτεῖ . τότε τοίνυν τὰ μὲν ἔμελλεν , ὡς ἐδόκει , τῶν δεινῶν , τὰ δʼ ἤδη παρῆν , ἐν οἷς τὴν προαίρεσίν μου σκόπει τῆς πολιτείας , μὴ τὰ συμβάντα συκοφάντει . τὸ μὲν γὰρ πέρας ὡς ἂν ὁ δαίμων βουληθῇ πάντων γίγνεται · ἡ δὲ προαίρεσις αὐτὴ τὴν τοῦ συμβούλου διάνοιαν δηλοῖ .
18.193μὴ δὴ τοῦθʼ ὡς ἀδίκημʼ ἐμὸν θῇς , εἰ κρατῆσαι συνέβη Φιλίππῳ τῇ μάχῃ · ἐν γὰρ τῷ θεῷ τὸ τούτου τέλος ἦν , οὐκ ἐμοί . ἀλλʼ ὡς οὐχ ἅπανθʼ ὅσʼ ἐνῆν κατʼ ἀνθρώπινον λογισμὸν εἱλόμην , καὶ δικαίως ταῦτα καὶ ἐπιμελῶς ἔπραξα καὶ φιλοπόνως ὑπὲρ δύναμιν , ἢ ὡς οὐ καλὰ καὶ τῆς πόλεως ἄξια πράγματʼ ἐνεστησάμην καὶ ἀναγκαῖα , ταῦτά μοι δεῖξον , καὶ τότʼ ἤδη κατηγόρει μου .
18.192
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.189 | Dem. 18.192 (English) | >>Dem. 18.195 |